Пятница, 29 марта 2024

Служба святителю Павлину Милостивому епископу Ноланскому

Служба святителю Павлину Милостивому, епископу Ноланскому (†431), составленная святым священномучеником Петром Григорьевым (†1937, память 10 (23) сентября), воспроизводится по изданию: «Вестник русского христианского движения», № 3-4 (132) за 1980 г. (стр. 7 – 17). Форматирование текста по возможности приведено к стандартному оформлению богослужебных последований.

Исследователи предполагают, что эту службу и акафист святителю Павлину свщмч. Петр написал для свщмч. Павлина (Крошечкина), архиеп. Могилевского (†1937), под омофором которого св. Петр служил в 1921 – 1926 гг. Святитель Павлин был Небесным покровителем в постриге архипастыря-новомученика. «Когда читаешь службу св. Павлину Ноланскому, написанную прот. Григорием Петровым (на самом деле свящ. Петром Григорьевым — u.), ясно видишь духовный облик архиепископа Павлина, всей своей жизнью подражавшего житию своего ангела. Его твердость, глубокий ум, большая культура и активность — образец для подражания» (Н. Шеметов).

Служба святителю Павлину, епископу Ноланскому
Творение священномученика Петра пресвитера
На велицей вечерни
На Господи воззвах: стихиры на 8, глас 6:

Днесь торжествуют мира концы / память святителя великого, / и радуется вся вселенная, / величающе Павлина божественного // яко образ совершенного на земли жития.
Многоводная реко, / чудес волнами шумящая / и милости струи источающая, / явился еси, Павлине. / Крепка, паче смерти, любовь твоя / и яснее солнца твое милосердие, // тем же, лучами твоими озаряемы, радуемся.
Авзония, славного ритора, ученик / славу и премудрость мира откинул еси / и в горах Пиренейских уединился, / глубину знаний твоих Христу посвятил еси, / тем же писаньями твоими укрепляема // Церковь радуется.
Сокровище века златаго церковнаго / был еси, святителю. / В составлении песней духовных потрудился еси, / и множество благолепных икон написал еси. / Провидя же издалече духом веры / грядущую ересь иконоборную, // почитати святые образы и мощи всех поучал еси.

Глас 8:

Аще и умре святитель Павлин, / но любовь его во веки не отпадет, / почерпайте вси изобильно его милости. / Прииди к нам от небесных высот, / посети наши скорби благодатию, / миром и радостию и умилением обогащая, // и научи в терпении тебе подражати.

Слава, глас той же:

«Аще кто хочет быти болий, / да будет всем слуга», / — глаголет Христос, учеником ноги омывая. / Тако и Павлин верным проповедует, / первее все имение бедным расточая, / и с супругою глад и лишения терпя, / напоследок же и себя в рабство предая, / воистину возлюбив своих до конца, // ты же, Господи, вложи нам подражати ему желание.

И ныне, догматик.
Паремии святителя.
На литии стихиры, глас 5:

Якоже звон колокольный, / из глубины первых веков / звучит богословский глас твой, / святителю, свидетельствуя учение древних христиан, / его же до днесь хранит нерушимо / Православная Христова Церковь. / Мы же с тобою в истинах веры утверждаемы, // Христу благодарение возносим.
Мы ропщем в скудости, / святитель же обнищал волею, / мы ищем ясти изобилия, / угодник же и последний хлеб раздаяше, / мы страшимся скорбей и бед, / сей же сам себе отдаде в рабство, / душу свою положивший за други, / и обители вечные у Христа обретый, // святителю истинный, слава тебе.
Даждь нам твою любовь, / даждь нам твое милосердие, / веру несомненную и терпение, // даждь нам спастися твоим путем.

Слава, глас тойже:

Что есть сильнее любве? / Сие слово утвердил еси, святителю, / сам возжелав пострадати, да страждующим / свободу даруеши. / Горького плена не убоялся еси, / душу за овцы своя положив, // с Ним же ныне царствуеши в свете невечернем.

И ныне, Богородичен.
На стиховне стихиры, глас 2:

Днесь почитаем память в рабство предавшегося / и всего себя истощившаго ради страждущих, // днесь призываем в помощь и по смерти бессмертнаго.
Днесь слагает святитель ризы епископства, / и облекается в рубище раба, / и приносит новую жертву богоподобную, / себе отдает в тяжкое рабство, // даруя избавление сыну вдовицы.
Днесь вопиет вдовица князю: / возьми свободного и отпусти раба, / верни мое чадо и поработи пастыря, / даждь ми сына и приими отца, / избави мя от сиротства и обогатися духовно, // ибо предлагают ти нетленный бисер Христов.

Слава, глас тойже:

Рабство твое, о Павлине, / свободы многим быть ходатайственно, / ибо, прозорливостью твоею вразумлен, / царь отпускает из горького плена // с тобою всех духовных чад твоих.

И ныне, Богородичен:

Мария Пресвятая, / от падений греховных сохрани нас, / ты бо еси Голубица горелетная, // чада свои под крыле собирающая.

Тропарь, глас 3:

Правило веры несокрушимыя, / и образ милосердия Христова был еси, Павлине, / вся бо радости мира отринув, / за угнетенных в рабство предался еси. / Тем же любовию твоею озаряема, // вселенная славит тя.

На утрени
По 1-м стихословии седален, глас 1:

Славу святых воспевати дерзаю / и добродетелей тех, увы, не подражаю, / но ты, угодниче предивный, / преобрази и просвети жизнь мою.

Слава, и ныне:

Владычице и Мати моя Пресвятая, / мене, грешнаго сына, / от вечные погибели спаси.

По 2-м стихословии седален, глас 4:

Будут имущие жены, яко не имущие, / глаголет апостол, / сие слово к тебе приложимо, / святителю, тем же ублажая высоту жития твоего, / вопием ти: дух целомудрия подаждь нам.

Слава, и ныне:

Чистая Дево, очисти сердца наша, / и возвыси умы, / омрачении смрадом страстей.

По полиелее седален, глас 2:

Благодатный угодниче Божий, / научи нас за други душу полагати, / гонений и уз не боятися, но дело Божие / трезвенно совершати.

Слава, и ныне:

Воздвигни мой ум, обрадованная, к Небесному Царю, / да плотское мудрование отложив, / горе сердце мое вознесу.

По Евангелии стихира, глас 6:

Яко же звоном цветочных колокольцев / исполнение молитвы твоея / возвести тебе Господь, / сице и ты, угодниче, / даждь откровение нашему духу, // яко услышано моление наше.

Канон, глас 3.
Песнь 1.
Ирмос: Воды древле:

Яко же ты сам потрудился еси / в писании песен духовных, / тако и ныне нас умудри / воспети твои подвиги, святителю.
В житии своем соблюл еси верность Господеви, / рабства и нищеты не убояхся, / умножи убо и нам веру, / да и не смущается сердце наше.
Ослабеваем дерзновением, / упования твердаго не имамы, / на твое же взирающе дивное житие, / духом обновляемся, святителю.
Богородичен: Владычице мира, Святых благая собеседнице, / возглаголи сердцам нашим утешение.

Песнь 3.
Ирмос: Иже от не сущих:

Купно со святителем Павлином / да почтется и супруга его Тарасия, / яко великая жена христианская, / обратившая мужа своего ко спасению.
Не имея своих чад, / воспитал еси убогих и сирот: / научи и нас о бесприютных детях пещися / и разумети скорби сиротливых душ.
Посмеяния друзей не убоялся еси, / поносивших тя за отречение от блеска мирского, / укрепи и нас без смущения / спасительное дело Христово совершати.
Богородичен: Молитвами безсеменно рождшия Тя, Спасе, / постави рабу Твоему / слово Твое и страх Твой, / да спасуся.

Седален, глас 7:

Странноприимец был еси, святителю, / воззри убо и на мя обнищавшего, / сокровище добродетелей расточившего, / и приими милостиво в вечные кровы, / утомленного странствием земным.

Слава и ныне:

Радуйся лествице, иже Иаков виде, / к Небесному Отцу нас приводящая, / Богомати Пречистая.

Песнь 4.
Ирмос: Положил еси к нам твердую любовь:

Хочет враг нас, яко пшеницу, рассеяти, / но ты, добрый деятель Христов, / собери в небесные житницы наследие твое.
Яко же во дни пленения и прочих бед / был еси утешитель паствы твоея, / сице и нас печалию помраченных / просвети надеждою на Бога.
Превыше Иова воссиял еси нищетою добровольною, / он бо и на гноище свободен пребысть, / ты же волею рабство приял еси, / да Христа приобщаеши навеки.
Богородичен: Воссиявшая миру великое солнце Христа / сподоби нас, Владычице, / животворящих и бессмертных лучей Его.

Песнь 5.
Ирмос: К Тебе утреннюю:

Многажды отдавал еси бедным / последний хлеб из дому твоего: / научи и нас подражать твоему примеру.
Не восхотел еси радоваться со счастливыми, / но, памятуя скорби убогих страдальцев земли, / сих участь предпочел еси: / нищету, бесприютность и рабство.
В письмах поучал еси пламенно / о пользе молитвы за усопших, / ныне помолимся, святителю, / о скончавшихся близких наших.
Богородичен: О светоносная Дево! В час исхода моего / отверзи ми двери Небеснаго Царства, / да идеже Господь мой, тамо и аз, / слуга неключимый, вселюся.

Песнь 6.
Ирмос: Бездна последняя:

Ты еси супружества о Господе венец, / ты и отречения монашеского образ: / тем же и монаси, и мирстии / чтим твою память с любовию.
Кто тя достойно воспоет, дивный Павлине? / Не обретаем ангельских гласов, / да восхвалим человека небеснаго.
Ныне совершил еси подвиг твой / и зриши Бога лицом к лицу: / очисти и наши сердца, / да убежим от нощи сомнений и неверия.
Богородичен: Владычице мира, / ослабевшую душу мою / умудри к созерцанию Божественных видений.

Кондак, глас 8:

Возвещал еси усердно, святителю, / о силе ходатайства святых за мир, / ныне писанное тобою делом яви, / яко великий угодник Божий, / возвесели сердца зовущих: // радуйся, Павлине, святителю милостивый.

Икос:

Ангел утешитель скорбящих и немощных кроткий / к небесам путеводитель был еси в житии твоем, святителю, / душу свою за спасение униженных / положил еси, тем же ароматом добродетелей твоих / услаждаемы, величаем тя хвалебно: / радуйся, благоуханное миро смирения, / радуйся, добрыми делами Отца прославимый, / радуйся, любовию скорбных согреваяй, / радуйся, образе христоподражательного жития, / радуйся, Божию славу жизни своей проявивый, / радуйся, Павлине, святителю милостивый.

Песнь 7.
Ирмос: Якоже древле:

Ты был еси, отче, садовник искусен, / твоими молитвами яви мя / яко цвет благоуханен, / насажден в садах рая пресветлаго.
Обрет сокровище нетленное Христа, / ты первее в горы уединился еси: / вразуми и нас безмолвие любити, / да в тишине ума и сердца узрим Бога.
Ты вся познания мирския, / всю мудрость Господу посвятил еси, / научи и нас вся дарования своя / во славу Его единаго обращати.
Богородичен: Владычице, Надеждо ненадежных, / не даждь до конца погибнути ленивому рабу, / но силою благодатною исцели / расслабление воли моея.

Песнь 8.
Ирмос: Нестерпимому огню:

Среди нашествия варварского и нестроений / извел еси корабль паствы твоея / в тишину Христову, / тако и с нами сотвори.
Умоли Христа Бога о Церкви, / ересьми, неверием и распрями обуреваемой, / даждь пастырем силу и мудрость / право правити слово Господней истины.
Вопиют к Тебе священных соборы / и монашествующих полки: / на твердом камени веры Христовой / утверди сердца, тьмою бед устрашенныя.
Богородичен: Светоносным омофором Твоим, Пречистая, / Церковь Сына Твоего / всегда охраняй от искушений и непосильных бед.

Песнь 9.
Ирмос: Новое чудо:

Ты еси чистоты светильник / и воистину друг Божий, / исторгни нас из блата страстей / и сладостию духовной напитай.
Ты еси врач согрешающим, / ты еси пастырь премудрый, / управи наше мятежное житие / к обители святыни и покоя вечнаго.
Многажды восхвалял еси / тайну Святыя Евхаристии, / пробуди в суетных душах наших / жажду Святаго Причастия.
Богородичен: Преблагословенная, Чистая, / пребуди со мною на всяк день же и час, / да радостен буду, и не впаду в сети / отчаяния и нечестия.

Светилен:

Яко светило неугасаемое / и по смерти показался еси, святителю, / благоуханием мощей твоих целебных / и красотою великих чудес.

Слава, и ныне:

Спаси, Христе Боже, люди Твоя, / и страну осени тишиною, / за молитвы Матери Твоея / и Павлина милостиваго.

На хвалитех стихиры, глас 4:

Тако вопиет святитель верным: / дерзайте, чада моя, / аще и далече в Риме почиваю, / но духом неразлучен с любящими мя / и призывающих с верою зрю, // непрестанно молюсь о душах ваших.
Тако глаголет угодник молящимся: / яко же при жизни моей, / слыша вопль скорбей и нищеты, / ускорял за ны помощь, / сице и ныне не могу зрети страданий человеческих / и гряду всех утешити // благодатию Божественных милостей.

Глас 8:

Святителю отче Павлине, / яко же Илиа возносимый, / даде благодать свою Елисеови, / сице да опочиет и на нас / твоя неисчерпаемая сила духовная, // благодатно славящих память твою.

Слава, глас тойже:

Святителю отче Павлине, / яко же человек нося ароматы / сам благоухания исполняется, / тако с тобою молитвенно соединившейся / да исполнимся твоих добродетелей миром, // и наслаждение вечное унаследуем.

И ныне.

Явилася еси купина пламенеющая, / с человеки соединившая огнь Божества, / страсти наша очищающая, / пламень Божественнаго умиления. / Тем же тя вси роди ублажаем, // Всеблаженная.

Текст оцифрован и перепечатан с журнала «Уставщик».